O RATO DO MONTE E O RATO DA CASA (conto)

Saíu de paseo un día de inverno un rato caseiro e topou no monte cun rato do campo.
-E ti como andas así tan fraquiño e debilucho –dixo o rato da casa- Ven comigo, que na casa onde estou hai sempre que comer, non hai que pasar frío nin mollarse para atopar comida.
-E non hai perigo de gato? –preguntou o do monte.
-Non oh! –respondeu o da casa- Hai un, pero parece medio parvo, sempre está durmindo, eu paso diante del e nin sequera me ve.
E foron os dous para a casa.
Estaba o gato durmindo diante da porta. Pasou por diante todo confiado o rato da casa. O gato abriu un pouco un ollo, deu un salto e o rato da casa quedou atrapado entre as poutas e os dentes do gato.
O rato do monte que tal viu deu media volta e escapou dicindo:
-Vale máis rato non monte fraco, ca rato gordo nos dentes do gato.