Exercicio 11. Pronome persoal: explicar a colocación dos pronomes átonos

1. Que a fortuna te acompañe o resto da vida!

te: encabezada por que.

2. Penso que non che dixo a verdade.

che: oración subordinada.

3. Oxalá te deixen vir á miña casa!

te: encabezada por partícula exclamativa.

4. Dixo que lle non dera o pan.

lle: oración subordinada e interpolación da negación.

5. Pampos quedaron ao velo daquel xeito.

lo: despois de infinitivo.

6. Deus cho pague, eu non teño cartos hoxe!

cho: oración desiderativa con suxeito anteposto.

7. O demo te leve, rapaz, mira que es trasfego!

te:oración desiderativa con suxeito anteposto.

8. Agora te atendo, non desesperes, muller.

te: agora equivale a axiña.

9. Agora aténdote, non desesperes, muller.

te: agora equivale a neste momento.

10. Logo che fago o pedido que me encargaches.

che: logo equivale a axiña.

11. Logo fágoche o pedido que me encargaches.

che: logo equivale a despois, máis tarde.

12. Marchei axiña porque me doía moito a cabeza.

me: oración subordinada.

13. A vida che entrego, compañeira dos meus días!

che: por desprazamento do obxecto directo.

14. Iso me contou, non mentiu.

me: por desprazamento do obxecto directo.

15. Paseino tan ben co libro que, se puidese, volvíao ler.

no: regra xeral. o: pola lonxanía e inciso entre o nexo e verbo.

16. Aí o tes, podes collelo.

o: pola énfase na deíxe do adverbio. lo: despois de infinitivo (tamén pódelo coller).

17. Aí telo máis á man, podes collelo.

lo: agora o adverbio indica unha mera circunstancia de lugar. lo: despois de infinitivo.

18. Comeron todas as papas? Sobras lles quedaron!

lles: pola anteposición do predicativo.

19. Parecía que me non vira nunca.

me: oración subordinada e interpolación da negación.

20. Calquera cho pode contar mellor ca min.

cho: encabezada por un indefinido.

21. O meu corazón che entrego, meu caravel!

che: por desprazamento do obxecto directo.

22. Antonte mandeiche un correo electrónico.

che: por regra xeral, antonte non provoca anteposición.

23. Moitos fóronse porque a música era má, o local peor, e divertíanse pouco.

se: por regra xeral, moitos non provoca anteposición. se: por estar lonxe da subordinación.

24. Pensaba que me non ía coller o viño todo no bocoi.

me: oración subordinada e interpolación da negación.

25. Despois pedireiche un favor.

che: por regra xeral, despois non provoca anteposición.