Con 5 anos cambiei de residencia, Aldán. Marchei para a Cervela (no Incio) vivir co meu tío cura José. O Angilitiño de Trasar pasou a ser Angelito, era o rei da casa reitoral e como sobriño do crego moi ben tratado por todos. Engordei e púxenme repoludo, volvía a Trasar de vacacións e meu irmán maior dicíalles aos viciños: este pace do rego abaixo. Tiven moita sorte, a Elisa coidoume coma un fillo e a Sra. Carmen coma un neto.

Foron bos tempos aqueles, Aldán, ata que aos 11 anos me tocou marchar para o Seminario de Lugo. Tamén o tío José marchou de cura para Chinchón en Madrid. E botei anos sen volver pola Cervela.

Pero a Cervela sempre seguiu na miña memoria. Cantas veces lle contei a teu pai de rapaz contos da Cervela, xa debía estar canso deles pero nunca protestaba.

Agora, Aldán, coa Internet recuperei amigos, espazos e lembranzas da Cervela. E podo compartilos contigo.

ogalego.eu/ogalego.gal ten unha licenza Creative Commons Atribución-Non comercial-Compartir igual 4.0 Internacional.